政府每逢推出重大政策時，都會做樣喺全港各區搞幾場諮詢會，但呢啲諮詢會真係得啖笑，事關政府為咗選擇性聽取意見，乜嘢招數都出齊。相信大家都聽過，獲邀出席諮詢會嘅市民係要經過各區民政事務處篩選，大部分都係自己友。另一招仲犀利，有讀者向我哋爆料，話諮詢會職員喺處理現場發問抽籤過程中出蠱惑，抽中支持者提問嘅機會特別高。
話說諮詢會開始前，負責官員首先邀請反對人士入場，等佢哋可以先將人名或意見卡放入問題箱內，然後才放支持者進場，並放入意見卡。
政府之所以會咁做，美其名係想話畀市民聽，政府非常尊重反對聲音，但其實係想將所有反對意見卡「沉底」，等支持政府嘅意見卡可以擺喺上面，而主持人亦只係抽取表面嘅意見卡，結果係點都毋須多講，做法認真差劣。