政情：社民連新星 殺入民協老巢
區議會選舉喺兩個月後舉行，唔少疑似候選人為贏得街坊歡心，派月餅、旅行團、搞蛇宴、影學生相等全部招數統統出齊。不過，計劃喺區選殺入深水埗民協老巢嘅社民連新星鄧美晶（Sally），就講明乜都唔會派，只會帶領街坊抗爭，以爭取權益，仲話如果當選區議員，會將一半人工捐出做抗爭基金。
社民連向來予人好激嘅感覺，但Sally表面睇落好斯文，而且仲係高材生，喺英國讀完高中後回港入讀港大，仲要雙主修哲學及社會學，一啲都唔簡單。Sally話本身來自中產家庭，幾年前開始走上街頭，全因見到社會嚴重不公、貧富懸殊不停加劇，但煲呔曾卻不知民間疾苦，佢炮轟政府從不手軟。
現時港人入息中位數係一萬零五百元，Sally話，如果做到區議員後會以身作則，拎中位數就夠用，其餘全部用嚟搞抗爭。不過，要殺入民協老巢的確好困難，Sally話落區時最主要關注工人權益，又話如果全港工人肯團結大罷工，最低工資一定唔止廿八元水平咁低喎。