政情：黃家和盼會陳豪交流飲咖啡
有「香港咖啡大王」稱號嘅香港餐飲聯業協會主席黃家和（Simon），父親黃橋及叔父們係香港第一代茶餐廳及咖啡室嘅創辦先驅，Simon繼承家業後發揚光大，難怪佢喺本港飲食業享有嘅江湖地位咁穩固。Simon今日會喺一個電台節目暢談往事，自爆好多罕為人知嘅奮鬥故事，仲笑稱希望同新一代咖啡王子陳豪見面交流添！
唔講唔知，陳豪做代言人嘅捷榮咖啡，前身捷榮辦館正係Simon父親於一九三二年創辦。西港城旁嘅海安咖啡（舊稱「海安冰室」）、已結業嘅上海街「九龍冰室」，亦都係黃父於五十年代初創辦，加上幾位叔父分別喺港九開設多間茶餐廳或咖啡室，難怪Simon對香港嘅茶餐廳文化咁珍視，仲積極申請將奶茶列入聯合國人類非物質文化遺產添！
Simon諗起細個喺冰室幫手做樓面嘅日子，話最怕挖雪糕會挖到手痛。後來佢到美國讀書都要捱窮，試過個袋得番二十元，要喺半夜送Pizza外賣賺外快。好彩父親教導佢要以平常心做人，幫助佢度過好多家族風浪。