政情：「舊電池」垃圾料美領事也中招
好多政府同高官聞風喪膽嘅維基解密（Wikilinks），前日再喺網上發放逾廿五萬份美國政府機密外交電文，而且讀者毋須密碼就可以查閱，當中唔少涉及美國駐香港總領事館（領事館），顯示美方喺香港討論二○一二年政改方案期間，一直密密向各界人士收風，再向美國有關當局分析匯報。可惜領事館有時所託非人，搵着啲out晒嘅「舊電池」攞料，事後證明部分意見「完全係垃圾」！
領事館喺○九年十一月向美國有關當局發出電文，分析二○一二年政改方案能否通過及中央嘅態度，當中提及領事館向一啲同港府及中央都有緊密聯繫嘅人收過風，認為中央唔會對香港政改讓步。呢啲聽落咁把炮嘅人係邊個？原來係指中央政策組顧問邵善波及港區人大代表田北辰！畀啲傳統左派聽到真係唔知好嬲定好笑。
邵善波田二少報料無樣啱
電文引述邵善波指，中央好可能會提出一個同○五年政改差唔多一樣嘅方案，唔會再作讓步；至於田二少亦向領事館指出，中央一定會對將來嘅特首選舉抓得好緊，以免選出一啲中央唔願意任命嘅特首。電文最後總結一二年政改方案能否通過嘅關鍵，在於一百零二位由特首委任嘅區議員，有冇權喺新增嗰五個立法會超級區議會議席同特首選舉中投票。但事實上最後方案獲得通過，關鍵在於中央破天荒向泛民主派讓步，容許五席超級區會以一人一票方式產生，有關分析明顯有誤。
另一封相信喺「五區公投」同中央開始與溫和民主派談判前發出嘅電文，就分析咗「公投」對泛民各黨派同政改形勢嘅影響，搵咗終極普選聯盟成員馬嶽、前港區人大代表李鵬飛及民主黨前立法會議員羅致光攞料。其中馬嶽私底下對中央會否同佢哋談判深表悲觀；李鵬飛認定民主黨唔肯參與「公投」會淪為大輸家；羅致光就預言民主黨嘗試與中央對話，有望打破本港泛民與親北京陣營壁壘分明嘅局面。最後三個人嘅估計又係錯晒。
當然，今次維基解密披露嘅只係一部分電文內容，美國政府每年花咁多錢、派咁多人喺香港收集情報，肯定唔會次次都搵錯人或收錯料。不過，事後睇番有關人等向美方提供嘅情報同分析，頗有娛樂性。