中環出更：楊素珊召好友 北京開畫展

公關公司老闆Susan係城中才女，佢習國畫多年，又曾留學美國紐約學習美術及電影製作。為挑戰自己，早前佢號召香港一班跨媒體創作人，九月中喺北京今日美術館開畫展，主題為《生息》，帶出珍惜自然意味。

音樂奇才金培達，原來都係環保分子，以樂聲喚起關注；填詞人陳少琪就展出素描及攝影作。Susan又大爆翁狄森係「綠色生活人」，屋企同埋寫字樓都拒絕開冷氣。

畫展將於廿六日喺北京剪綵，專資會會長胡曉明及廠商會副會長施榮懷都會北上撐場。Susan賣關子話，會即場畫幅畫，收益將撥捐中國綠色炭匯基金會拯救中國虎基金。