中環出更：廣東社團總會晚宴大孖沙齊泵水
廣東社團總會日前喺會展舉行會董就職晚宴，冧莊做主席嘅王國強（KK）「吸水力」爆燈，城中商界大孖沙紛紛「泵水」，當中信和置業主席黃志祥、牛仔褲大王楊釗及碧桂園主席楊國強捐得最豪，各捐一百萬元；而金利來太子爺曾智明同「零食天王」戴德豐都各捐三十多萬元，總之富豪善長個個排住隊送上大支票，令總會進帳不少。
廣東富豪咁闊綽，除咗係撐自己廣東幫外，仲因為做阿頭嘅KK帶頭捐一百零二萬元。當晚賓客多達二千人，KK就好似娶新抱咁high，滿場飛敬酒，連飯都唔食。佢話為打點就職晚宴，三晚無乜點瞓覺，全家亦總動員出動，夠晒齊心。
廣東社團總會今屆有唔少生力軍接棒，好似康泰旅行社太子爺黃進達（Jason）就「升呢」做青委會主任。卓妮見佢左腳拐吓拐吓，Jason笑言係踢波舊患發作，叫大家唔使擔心。
蔡加敏為瘦身頭痛
佳寧娜太子爺馬鴻銘就擔任總會副主席，玩具大王蔡志明長女蔡加敏（Carmen）當然要到場撐老公啦。講起湊仔，Carmen話大女靄翹初次返幼兒園，上課時不時主動搶答，表現雀躍。至於一對七個月大嘅孖仔亦精乖易湊，唯一令佢頭痛，係產後瘦身好難，事關生完第二胎，好似無瘦得咁快喎。
卓妮