添馬艦立法會新大樓嘅內部裝修已經完成得七七八八，只要大樓嘅電子系統順利通過測試，搬竇一事指日可待。立法會行政管理委員會尋日視察新大樓嘅閉路電視，原來大樓有成四百幾部咁多，但經保安顧問睇完一輪之後，認為有成一百個毋須安裝。唔單止咁，前排新大樓記者室安裝閉路電視曾引起傳媒不滿，依家都徇眾要求拆走晒。
由於新大樓面積大好多，令閉路電視數目激增，單係新大樓外圍已有三十部。行管會主席睇完之後話，安裝閉路電視要平衡保安同私隱需要，萬一新大樓內有意外、衝突，甚至被人爆竊，保安員都可以睇到確實位置，以及影低疑犯樣貌。不過，鑑於傳媒不滿，記者室唔會裝喇，可能改裝對講機，讓傳媒同保安保持聯絡。
有議員批評新大樓正門入口，細到好似山洞入口，人多隨時變成樽頸位。又有議員認為公眾席樓梯太斜要加裝欄杆，而會議室枱角太利要整圓啲，但呢啲只係小問題，唔會影響搬遷。行管會今朝會喺新大樓開會，討論電子系統測試報告，相信好快可以決定幾時搬了。