本身居住喺友愛邨嘅Carlos話，佢喺中三加入港隊，同胡兆康前後做咗八年隊友，對方全無架子，而且好照顧新人，但由於要落手落腳做地區工作，所以兩星期前就正式退出港隊，轉做保齡球教練，傳授個人心得畀小朋友。
Carlos現年只有二十三歲，一心一意想做好地區工作幫人，全因為佢眼見警權過大，香港嘅公義愈來愈得唔到彰顯。Carlos話，好似今年七一遊行，市民只係想表達反對替補機制嘅聲音，但警方就如臨大敵布防，最後仲拉咗好多留守到最後嘅後生仔，當時佢喺現場目睹一切後好感慨，矢言爭取公義絕非十惡不赦，所以一定會繼續為民請命，為公義兩個字努力打拚到底喎。