政情:劉夢熊轟《壹週刊》百分百造謠

今期《壹週刊》封面報道多名政界人士早前雲集政務司司長官邸,重點討論國務院副總理李克強訪港嘅保安安排,事後被駁斥毫無事實根據、純屬捏造,但原來同期《壹週刊》嘅另一篇報道,屈人屈得仲離譜。今次受害嘅係全國政協委員劉夢熊,佢怒斥有關報道係「百分之百的造謠!貨真價實嘅亂編!如假包換的老作!」要求對方撤回報道兼賠禮道歉,並保留法律追究權利。

該篇報道題為《劉夢熊急住祝賀未來特首》,繪聲繪影、圖文並茂咁話劉夢熊喺李克強訪港同各界人士嘅晚宴上「走勻全場,表現興奮」,「急住」向三名疑似特首候選相關人士道賀,包括對某位署長話「恭喜你老細喎(政務司司長唐英年)!」對行政會議召集人梁振英嘅助理話恭喜人家老闆,以及向全國人大常委范徐麗泰嘅兒子范駿華話「恭喜晒你媽咪呀!」暗諷劉夢熊向未來特首擦鞋獻媚。

「生安白造乃新聞界之恥」

不過,劉夢熊尋日發表題為「《壹週刊》生安白造乃新聞界之恥!」嘅聲明,澄清當日由於佢媽媽身體欠佳,佢出席完早上嘅「十二五論壇」後,就馬上趕回廣州探視,第二日先至返香港,根本冇出席該場晚宴。佢怒斥該篇報道「超低能、勁搞笑」,係惡意中傷兼造謠誹謗,「反映該刊物的職業操守已蕩然無存,公信力亦跌到零點甚至是負數,名副其實是『完全是垃圾』!」

Money18免費即秒股票報價網站現推出8升級功能,財經資訊,實時實發!