中環出更：鐘錶兩巨頭 齊齊娶新抱

港辦全球最大鐘錶展

尋日鐘錶界名人齊現身中環ifc嘅The French Window法國餐廳，為全球最大嘅香港鐘錶展將於九月七日揭幕熱身，同時頒獎畀今屆鐘錶設計比賽嘅得主。業界老行尊、總會永遠榮譽主席孫秉樞精神奕奕嚟撐場，唔少第二代亦蒲頭，例如香港工業總會副主席劉展灝嘅大仔劉燊濤、瑞士名錶英納格嘅代理商華明行執董高鼎國及細佬高偉國等，現場人氣勁旺。

香港錶廠商會會長蘇永強帶埋囡囡Sarah現身，Sarah已經喺公司幫手五年幾，難怪佢間o.d.m.公司設計創意無限。梁青華就同囝囝梁仲元（Raymond）一齊蒲頭，Raymond正係即將做老襯嘅新郎哥，佢除咗喺喜運佳幫手之外，仲出任總會嘅人才培訓部部長，熱誠抵讚。

梁青華（中）嘅囝囝梁仲元（右）即將結婚，喜上眉梢。左為高鼎國。

兩位女模（左一、右一）展示學生組冠、亞軍靚錶，同朱繼陶（左二）及劉燊濤（右二）開心合影。 （溫國佳攝）

上半年鐘錶業出入口總值加埋有六、七百億元，認真好景。不過華哥話，租金昂貴加埋供貨唔穩定，令零售業暗藏隱憂。高鼎國聽罷話佢唔做專賣店，正係呢個原因。

卓妮