中環出更：伍士銓掘墓 尋找埃及妖后
本港發明家兼牙醫伍士銓計仔多多，剝牙好少做，反而鍾意掘古墓！佢因研發「太空鉗」上火星探險而揚威國際，最近又有驚世任務，就係破解埃及妖后古墓。伍醫生話，已經鎖定古墓嘅位置，十二月就會用佢最新自主研發嘅探測儀器，深入妖后嘅棺木密室，希望揭開妖后驚艷嘅樣貌。
游說近十年終獲接納
伍醫生尋日同記者聚會時話，佢一直被埃及古老建築嘅鬼斧神工所迷倒，為咗揭開金字塔同古墓嘅神秘面紗，自從○二年至今，去過埃及不下二十次，幾經游說埃及文化部部長Zahi Hawass博士，對方先畀佢喺埃及展開探秘任務。
去年埃及當局應承畀佢窺探胡夫金字塔內王后密室嘅第二扇門後，依家仲破例畀佢掘埋埃及妖后及情人安東尼嘅墓穴添，都咪話唔巴閉。佢預計，妖后古墓喺亞歷山大港以西約五十公里嘅郊區，十二月就會聯同十幾個國際考古及科研專家，探測古墓嘅真正位置，如果有兩副棺材，就九成搵啱咗喇！佢準備用直徑二十毫米、長逾百呎探測膠管深入墓穴，到時謎底就會打開。
該古墓有二千幾年歷史，人人爭住掘，伍醫生話希望喺兩年內搵到門口。上星期佢仲親自飛去加勒比海嘅多米尼加共和國，會見本身係律師嘅考古學家Kathleen Martinez，因為呢位專家喺六年前已經搵緊個墓喎。為咗追夢，真係少啲毅力都唔得！
卓妮