「當生命似流連在摩天輪，幸福處隨時吻到星空，驚慄之處仍能與你互擁，彷彿遊戲之中忘掉輕重」，呢首歌係咪好浪漫呢？如果摩天輪喺正中環海旁，維港美景盡收眼底，咁點止浪漫吖，直頭幸福到痹喇。
唔係發夢㗎，有外資公司計劃租用中環新填海區政府土地，豎立一個六十米高嘅巨型觀景摩天輪同開設露天茶座，等市民同遊客可以飽覽聞名中外嘅維港景色，估計每日最多可以接待四千位客人。該公司話，英國同新加坡等地都有地標式摩天輪，香港亦可以用呢招增加中環新海濱嘅魅力及吸引力。
東方之珠加巨型摩天輪，既可以宣傳香港，又可以吸引遊客，造福市民，呢條橋唔錯㗎。不過咁，計劃可唔可以成事，夢想可唔可以成真，連呢間公司都唔敢寫包單。
大家都知喇，香港政府出咗名係議而不決，決而不行，申請豎立咁大個摩天輪，究竟要等幾耐，真係天曉得。正如該公司話齋，喺香港申請有關牌照手續繁複，「全球最難」，要提供大量相關設施嘅設計資料，直頭煩到抽筋。
有區議員直指，新加坡近年大力發展旅遊業，增加咗多項娛樂設施及觀景摩天輪，吸引大量遊客，但香港海濱一直未被善用，浪費咗公認全球最美麗嘅維港夜景，促請政府喺海濱增加商業及休憩設施，增加吸引力。
冇錯嘞，香港自稱「魅力之都」，旅遊業又係經濟支柱之一，但可以吸引遊客嘅景點唔使十隻手指已經數晒，當局應該着緊啲開發新旅遊資源至啱數㗎。家陣有人自動送上門，當局如果再因循守舊，官僚僵化，搞到人哋不勝其煩而打退堂鼓，咁就真係捉到鹿唔識脫角喇。
講真，姑勿論喺中環起摩天輪係咪可行，當局都應該靈活變通，同外資公司加強溝通，認真研究可行性，而唔係阻三阻四，潑人冷水。
查實，港府辦事僵化，效率低劣，導致本港整體競爭力每況愈下，早就臭名遠揚。呢，世界銀行舊年發表嘅全球營商環境報告顯示，香港無論營商環境定競爭力都輸畀新加坡。舉個簡單例子，選擇公司名稱同取得所需證書，新加坡一日就搞掂，香港要四日。唔怪得外資公司話香港起摩天輪係全球最難喇。
現代社會講求效率，爭分奪秒，人哋積極進取，一日千里，港府就龜行牛步，一成不變，唔輸九條街至奇喇。