警方喺國務院副總理李克強訪港期間嘅保安安排，備受各方批評。教育評議會副主席何漢權尋日喺電台節目爆料，話當日出席港大百周年校慶典禮時要經過四次安全檢查，認為過咗火位。出席同一節目嘅經濟動力立法會議員林健鋒就反駁，相比起美國機場嘅安檢，香港情況只係小巫見大巫喎。查實美國機場安檢嚴密，目的係防範外國恐怖分子襲擊，同香港警方針對本地居民、學生哥及記者完全唔同，點可以相提並論呢？
