新界廿七個鄉事委員會四月起就職後，各鄉委會先後舉行就職晚宴，其中同屬北區嘅上水、粉嶺、打鼓嶺及沙頭角四個鄉委會，尋晚就喺上水一間海鮮酒家舉行聯歡晚宴，筵開近三百席，場面熱鬧。由於鄉民擠得水洩不通，大會擔心座位不足，上水鄉委會主席侯志強就好豪氣拍心口，聲言擺出街都得，如果被告阻街嘅話，罰款由佢哋班鄉紳畀喎！
由鄉委會進身北區區議會當然議員嘅侯志強話，十一月區議會選舉唔關佢事，所以可以專心搞民生事務。好似為準備下月中秋節，佢就要使幾十萬元買月餅派畀區內長者，並且由於區內人口老化，需要籌更多錢幫助啲老人家，希望各方善長樂善好施幫幫手。佢強調自己講心唔講金，只要搞掂人心同民生，參選自然會勝出。
盛傳會捲土重來參加明年立法會新界東直選嘅自由黨榮譽主席田北俊，尋晚都有遠赴上水撐場。見田少身體抱恙聲沙沙，但依然好辛苦咁攞起支咪講嘢，話叫在場鄉民有事即管搵佢幫手添，真係為咗選票乜都得！