政情：張建宗縮骨拖延退保制
香港貧富懸殊同人口老化問題不斷加劇，多個政黨同民間團體都要求港府設立全民退休保障計劃，取代備受各方批評嘅強積金同綜援制度。不過，勞工及福利局局長張建宗一直漠視有關訴求，堅稱現有三大退休保障支柱，即強積金、個人儲蓄及綜援制度行之有效。最近佢仲同中央政策組首席顧問劉兆佳夾計，將有關問題拖到明年後先至處理，即係又將啲蘇州屎留畀下屆政府，認真縮骨。
立法會早前成立咗個小組專責討論全民退休保障問題，邀請各界發表意見，但遭反對設立全民退保嘅工商界杯葛，勞福局亦有意無意咁冷待有關討論，只肯派出低級官員列席小組會議。小組見張建宗毫無誠意，早前轉向劉兆佳埋手，要求中策組交代過往就退休保障問題做過嘅研究結果，希望藉此迫使勞福局做嘢。
不過，中策組都係幫政府做嘢，畀資料立法會等於畀塊石頭揼政府對腳。為咗敷衍立法會，中策組日前就覆信畀小組，只係透露佢哋喺○七至一○年間，一共做過五項有關退休保障嘅研究，並簡單交代結果顯示「現行三根支柱可以互相補充，現在和未來都會發揮這樣的作用」，口徑同張建宗一模一樣，好明顯係預先夾定。
諮詢只研究「三根支柱」
中策組又話，香港近年經歷咗唔少變化，包括生果金金額喺○九年開始加到一千蚊、強積金制度運作將會作出修訂、以及法定最低工資喺今年五月生效等，對長者嘅經濟收入構成一定影響，所以佢哋正因應呢個最新情況進行新一輪研究，包括展開一個全港性住戶調查同諮詢各界意見。中策組同時講明，今次研究嘅重點係如何改善同優化現有三根支柱，即係點都唔會另立全新嘅全民退保計劃，明顯又係一次預設咗立場嘅「偽研究」、「假諮詢」。
最離譜嘅係，中策組話有關全港性住戶調查，預計喺明年內先會有初步結果，即係明年七月今屆政府任期屆滿前，都肯定唔會有最終結果同具體改革建議，將問題又推晒畀下屆政府，到時張建宗同劉兆佳好可能已經落咗台，班議員都唔知可以向邊個追究。睇嚟全港長者同準長者都係自求多福，食少啲、着少啲，儲多個錢養老好過喇！