政情：孫啟烈：壟斷致仇商
夕陽政府對貧富懸殊問題毫無對策，引起社會仇富仇商情緒。不過工業總會名譽會長孫啟烈就話︰「我自己都係有錢人，唔覺有人對我唔妥。」又話香港人唔係妒忌有財富嘅人，話仇商只係因為有啲人賺到錢，濫用地位「撈過界」喎。
孫啟烈尋日話，香港人只係羨慕有財富嘅人，唔係妒忌。一個人努力做到成為老闆係會受人尊敬。「有啲人搵到錢捐出來，啲人唔會鬧佢㗎，都冇人鬧（娛樂大亨）邵逸夫、（已故電器大王）蒙民偉㗎。」仲話如果香港係仇商，佢就唔會做呢個位咁話。
孫啟烈又話，啲人話仇富仇商係因為有壟斷，「人哋生意好啲就瘋狂加租，仇係主要出現喺地產。」佢認為，政府應該立反壟斷法，因為依家講緊嘅競爭法針對唔到啲超市、油公司，只係搞到啲中小企。
同場嘅仲有經營時裝品牌嘅新民黨副主席田北辰。唔知佢係咪怕畀人仇視，所以話自己公司五年前已經唔止分花紅畀高層，其他員工甚至清潔阿姐都有，所以清潔阿姐日日都好好笑容。