區議會選舉殺到埋身，各大政黨都紛紛四出拜票，尋求地方勢力支持。好似自由黨就得到新界北區鄉紳支持，連續開咗幾個辦事處，加上鄉事派打算派四人出戰北區區議會選舉，部分選區更係同民建聯（民記）直接較量添，搞到民記有得震、冇得瞓。地區人士透露，民記幾位高層下星期就約咗上水鄉事委員會主席侯志強飲茶，希望可以撈番啲鄉事票。
當事人侯志強承認，下星期的確約咗民記包括主席譚耀宗、副主席劉江華，以及現任北區區議會主席蘇西智，但聲言只係敍舊喎。不過，侯志強坦言，北區四個鄉委會如果全力助選，最少可以拉到一萬二千票以上，有政黨搵佢哋傾偈好正常，就連民主黨黃成智平時都會約佢飲吓咖啡，所以飲餐茶唔代表啲乜。點都好，雖然民記今次拜票遲咗啲，但斷估都好過喺區選輸畀自由黨啩？