政情：項明生南美「敢」動假期
年前因為一齣電影，令瑪雅文化炒得熱烘烘，尤其係佢哋預言世界末日嘅日期，令到墨西哥呢個世界最大嘅遠古天文時計，更加多人留意。向來主張行萬里路嘅Sony Computer Entertainment Hong Kong市場部總經理項明生（James），早前就用咗十日時間，去咗南美墨西哥同古巴作深度旅遊，探討呢兩個地方嘅歷史文化。
體驗墨西哥古巴文化
James除咗了解墨西哥嘅瑪雅文化外，又去咗古巴睇吓點解呢個國家可以唔使納稅、點解禁止國民買賣車輛、房屋、點解限制唔能夠超過十二人一齊開餐、點解一個國家有兩種貨幣，佢仲將見聞寫成新書《十日敢動假期︰墨西哥、古巴》，今日會喺「國際旅遊展」發布，並會同上述兩國政府代表交換禮物，仲會送新書畀小母牛「開卷助人」計劃嘅小朋友。
其實項明生寫遊記都唔係第一次，上年佢推出嘅《足足五千年》電子版，去咗多個地方深度旅遊，本書唔單止高踞香港電子書暢銷榜，仲幫小母牛慈善基金籌咗五十萬善款添！