中環出更：潮商會攝影賽 晒人間有情

陳幼南話，佢已經玩相機好多年，依家仔女都長大離家，所以每逢假期佢同太太就會各自帶住自己嘅寶貝相機周圍去影相，好似西貢、赤柱等地，佢最鍾意捕捉大自然風景。原本事前大會有叫佢交兩張作品參展，但佢謙稱最終揀唔落手喎。至於胡劍江展出嘅兩幅相，係佢有次去澳洲旅行時嘅傑作。佢玩相機逾廿年，無數相片記錄咗佢嘅足迹，等於另類日記，好值得回味。

莊學山寸自拍不如照鏡

不過，莊學山就有唔同嘅睇法，佢話以前去旅行時都好鍾意影相，後來發現成日掛住影相，反而對旅程冇乜印象。

仲有，咁多旅遊相之中，竟然冇自己嘅影子，事關佢要揸機嘛，所以就慢慢唔玩喇！佢又話，依家後生仔鍾意自拍，連背景都欠奉，佢實在唔識欣賞，不如照鏡啦！

放大圖片	莊學山（右）同太太拍拖去撐潮商攝影比賽頒獎禮。