中環出更：醜聞司長缺席「最後」午宴
立法會宴會廳尋日筵開六席，最後一次喺中環立法會大樓設宴請高官食飯，出席嘅高官都好多，但唯獨近日淪為政治醜聞主角嘅政務司司長唐英年同財爺鬍鬚曾，就雙雙缺席午宴，逃避議員同傳媒追問、追訪，話之你係最後一次、定係第一次午宴，總之就避得就避，以免食到背脊骨落，醜態畢露。
林鄭叫高達辭職
夠膽出席嘅高官之中，以發展局局長林鄭月娥最得戚，一見到民主黨李永達（高達），就笑笑口叫高達考慮辭職。從來只有議員叫官員辭職，倒轉頭卓妮就未聽過喎！林鄭話，高達年初曾經承諾，如果政府能夠喺今年提供三萬個私樓單位供應，就會辭去議員職務，但尋日政府一口氣推出八幅土地拍賣同招標，涉及六千個單位，證明政府無講大話。
孫公腎病照隊酒
高達就反駁話，當時政府承諾係提供四萬個單位，而唔係三萬個，堅持如果政府做足四萬個，佢一定辭職喎。總之兩人你一言，我一語，口水花四濺。另一邊廂，愛飲酒嘅商界議員黃宜弘，又四出「隊」酒，但估唔到佢連洗腎度日嘅教育局局長孫明揚都唔放過，要求孫公飲番杯，孫公亦都無視自己病情，奉陪到底，估唔到孫公咁大個人都唔愛惜身體。
卓妮