政情：建制派狂轟派錢慢

政府早前宣布向港人派六千元，市民望穿秋水仍未有着落。民主黨立法會議員甘乃威終於忍唔住，尋日喺立法會要求政府交代細節。鑑於當局最新嘅派錢安排了無新意，所以鬍鬚曾唔敢親自上陣，費事畀班議員鬧到一面屁，就連財經事務及庫務局局長陳家強都去埋歐洲外訪，於是留低舊蘇州屎畀署理財經事務及庫務局局長梁鳳儀執手尾。

梁鳳儀話，政府將於第三季接受市民進行登記攞錢，至於如何分流七百萬香港人做登記，政府初步有兩個方法，一係用身份證號碼第一個數字，分階段要市民排隊，另一個方法係好似換智能身份證咁樣，按出生年份排隊，即長者優先攞錢。如果有人登記之後不幸離世，政府會繼續「向死人派錢」。如果市民唔登記攞錢，就有儲蓄獎賞。市民一係透過銀行戶口攞錢，一係透過抬頭支票收錢。

不過，派錢細節問題多多，例如居於香港境外市民、神志不清、行動不便嘅人士、在囚人士又點攞錢呢？真係唔好意思，呢啲細節一一欠奉，而幾時登記、幾時收錢，都係冇答案，所以議員拒絕收貨。甘乃威炮轟梁鳳儀只係透過「消息人士」放料畀傳媒，但係就拒絕向立法會交代派錢細節，等同藐視立法會。

「係咪要等我死咗先收到錢」

要數最落力狂插政府，非舉腳支持派錢嘅建制派莫屬。工聯會黃國健引述報章話，十一月市民先至有錢到手，佢就好勞氣咁鬧爆政府：「你哋（政府）到底識唔識寫『效率』兩個字，有乜嘢理由派錢要搞成七個幾月先至可以派錢？」

專業會議梁美芬亦抱怨，政府應該喺暑假前向部分人派錢，唔應該搞咁耐。有議員更引述唔少市民憤言：「係咪要等我死咗先收到錢！」

不過，梁鳳儀除咗識答「會盡快」之外，幾乎都啞口無言。相信唔少因為派錢而工作倍增嘅官員，心中都會因今次「忽然派錢」而怨聲載道，真係多得鬍鬚曾唔少囉！