中環出更：陳正欣做馬主一擊即中
馬迷投注考眼光好講運氣，做馬主都係一樣，買一匹良駒返來之前，先要抽中買馬許可證先至得。馬會前日公布下年度馬季購馬許可證中籤申請人名單，除咗藝人天王郭富城有着落外，好幾位名人才俊都升呢做個人馬主，包括保良局總理陳正欣、康泰旅行社董事總經理黃進達（Jason）及「壽司王」鄭威濤（Ricky）。
黃進達求教父親
陳正欣今年首次以個人名義抽中做馬主，佢前日先接到消息自己「中獎」，佢獲得許可證可以購買曾經出賽嘅進口馬匹。今次係佢第一次以個人名義入紙申請購買，結果一擊即中，運氣真係唔錯，咁啱佢之前睇中咗一匹新西蘭馬，依家應該會扑錘買入，至於馬名就會等愛駒年底到埗後再改喎。
至於首次升呢做馬主嘅Jason，佢坦言好驚喜，佢話會請教爸爸黃士心點樣揀匹駿馬，又話之前冇諗過抽籤會一擊即中，所以仲未有心水馬匹，唔排除會到國外選購，依家已開始搵定資料參考吓。至於馬名，佢話應該都會跟番家族嘅「旅遊」字頭，或者同屋企人傾吓，揀個好意頭嘅馬名。
卓妮