政情：限孕婦湧港政府被轟鴕鳥

立法會內務委員會尋日討論「十二五規劃」對香港嘅影響，勞聯立法會議員李鳳英批評港府一味掛住吸內地客同人民幣，冇認真諗過此舉對香港市民嘅影響，例如發展六大產業之中嘅醫療產業，就冇考慮到大量內地孕婦來港生仔，會嚴重影響對香港孕婦嘅服務，最近推出嘅補鑊措施亦係頭痛醫頭、臨急抱佛腳；對於內地客炒貴晒啲樓，又搞到奶粉缺貨，亦係採取鴕鳥政策，唔爆大鑊就唔處理。