政情：潘德鄰彈古琴「醫」川民
四川地震至今已經三周年，或許唔少人已經逐漸將當地災民遺忘，但本港有位醫生卻未敢忘記，每隔一星期就遠赴重災區德陽做義工，風雨不改，除咗為傷者覆診同做手術外，仲做埋社工嗰份，以古琴慰藉傷者心靈。呢位真正做到「俠骨仁心」嘅醫生，就係去年獲香港紅十字會頒發人道年獎嘅骨科專科醫生潘德鄰。
身兼德陽康復及假肢中心醫務總監嘅潘德鄰，每隔一星期嘅周末就會返四川，佢隨身攜帶嘅唔係手術刀，而係一副古琴，佢就係靠呢副秘密武器喺德陽義診時安撫傷者情緒。本身喺中環開診所嘅潘德鄰，雖然過去三年嘅義工生涯令佢賺少咗錢，甚至連休息時間都冇埋，但佢卻從不言倦，當年仲一口答應做五年義工添！
回想過去三年義工生涯，潘德鄰坦言少啲恒心都唔得，佢話：「我哋任何一個成員都唔可以得閒就嚟一次，唔得閒就唔嚟。」佢仲話，四川地震嗰一刻，短時間內見到好多傷者，來到康復中心唔單止幫到人，亦算為自己做埋心理治療。