中環出更：BB嗌「媽媽」陳晴感混淆
香港女仔，事業心非常重，唔多願湊仔，去年底一索得男嘅聯合國兒童基金香港委員會主席陳晴（Judy）就啱啱相反，為BB甘願放棄高薪厚職，做全職媽咪。Judy嘅半歲大囝囝已牙牙學語，識得叫「媽媽」。
初為人母嘅Judy覺得「媽媽」發音，同肚餓時想食「mum mum」嘅發音極之相似，一度好混淆喎。
高級珠寶品牌Queelin尋晚喺中環ifc舉行「Caring Robot」慈善展覽開幕酒會，Judy着上台灣設計品牌「夏姿」嘅全黑長裙，腳踏五吋紅色Platform高跟鞋，展示產後修身成果。Judy原來同Queelin創意總監兼品牌創始人陳瑞麟（Dennis）好有緣，尋晚佢戴住嘅閃令令金魚吊墜，都係Queelin出品，認真捧場。
戴凱欣嘆舖租急升
Dennis都好識做「回禮」，宣布將慈善作品拍賣所得款項，撥捐聯合國兒童基金會。
Judy講起湊仔就心甜，早排全城鬧日本奶粉荒，佢話唔驚，事關自己餵人奶喎。
轉過頭，卓妮遇到四洲集團太子女戴凱欣（Kennis），話題離不開通脹壓力殺埋身。Kennis話，佢哋家族有成七十間「零食物語」專門店，每月嘅租金要成過億元。
佢話部分業主趁市旺加租百分之一，加幅認真嚇人，但好彩品牌已「響朵」，搬遠啲都唔怕冇生意喎。
講番今次展覽，以機械人為主題，係八位年輕藝術家得獎之作，香港都有代表勝出，著名設計師靳棣強及香港設計中心董事會副主席劉小康睇完展覽，都大讚後生一代創意澎湃。
卓妮