政情:莊啟程捐款撐「莊啟程」

每逢會考放榜,大家都會見到唔少學生走去保良局莊啟程預科書院搵學位,無他嘅,皆因呢間學校入大學率高嘛。唔經唔覺,呢間書院創校已經廿年喇,當年捐款過百萬元創校嘅全國政協委員莊啟程,尋日專程參加學校廿周年校慶兼畢業禮,而且仲即場捐出十八萬元做獎學金,認真唔話得。

莊啟程話,呢間學校係自己廿年前擔任保良局主席時捐款創立,當時係九十年代,社會仍未流行兩文三語,但佢就洞悉先機,深深明白學生必須學好普通話,所以創校之初就推行兩文三語教育,至今成績有目共睹,亦證明呢個方向係正確嘅。

見到自己嘅心血發展得咁好,莊啟程都話好開心,仲鼓勵校方一定要堅持優質教育理念,等學生可以體現到兩文三語教學嘅好處同重要性。

莊啟程係書院嘅主要贊助人,尋日即席捐出十八萬元支票畀學校做學生獎學金,仲即時交畀現屆保良局主席龐盧淑燕,莊啟程咁有心,最幸福莫過於係班學生啦!

Money18免費即秒股票報價網站現推出8升級功能,財經資訊,實時實發!