中環出更：中大頒授院士名人齊撐場
尋日中文大學舉行第十屆榮譽院士頒授典禮，雖然天公不作美，但係一眾城中名人嘅熱情絲毫未減，齊齊現身力撐仁濟醫院副主席鄭承隆（Edwin）、地鐵行政總裁周松崗等八位獲頒榮譽院士嘅名人，現場氣氛開心熱鬧。
Edwin係翡翠工房集團創辦人，佢係中大新亞書院校董，幾年前又同家人慷慨捐助中大成立通識教育及哲學研究兩個基金。近年佢同細佬鄭承峰拍住做善事，兩人都係今屆仁濟副主席，仁濟最近協助更生人士不遺餘力，懲教署署長單日堅都親自嚟見證開心時刻。
另一位榮譽院士凱悅集團亞太區董事總經理朱民康（Larry），都有唔少政商界老友現身打氣，包括安老事務委員會主席梁智鴻（金刀梁）伉儷、行政會議成員楊敏德。原來Larry係金刀梁愛女嘅契爺，囡囡出世後就上咗契，轉眼已經三十幾年。
至於着件靚靚衫裙嘅楊敏德話，佢自細同Larry一齊長大，又曾經同佢學過酒店管理，大家係幾十年老友記，認真唔簡單。
筆名「小思」嘅名作家兼傑出教育家盧瑋鑾亦獲頒榮譽院士，佢獻身教育數十年，作品曾入選「十本好書」及「中學生好書龍虎榜」，桃李滿天下，卓妮都曾經係佢嘅小讀者。卓妮好奇問佢取呢個筆名嘅淵源，原來因為自己個名筆畫太多，加上身形細細粒，所以咪改咗呢個名囉！
周松崗換袍快閃
獲頒榮譽院士嘅仲有著名慈善家梁雄姬、前公開大學校長譚尚渭。至於一向玩快閃嘅周松崗，尋日繼續施展呢個本領，影完大合照就速速換袍閃人，卓妮問佢屋企人有冇嚟支持，佢笑笑口話有啊，不過走咗喇，因為怕咗傳媒喎！