夕陽政府一味Hea住治港，煲呔曾一味唱好香港「全民就業不會大亂」，風調雨順，落雨水浸街塌吓樹，好平常梗會有。一如有啲議員話齋「天台玻璃屋個個都係咁建」就以為「冇違規」，霸官地擺雜物「有默契」就掂。
所以話，煲呔曾理鬼你通脹惡化、加風四起、樓價高過九七，佢告五天假出席豪門婚宴，孭住相機做「龍友」都唔知幾風騷，然後人雖離岸心繫香江，整段「母親節憶眾兄弟夾錢請慈母吃燒鴨髀」嘅官方網絡視頻短片，以為感動自己就可以感動港人，如此不給力，唔該慳啲啦！
講開老朽又氣上心頭，上樑不正下樑歪，立法會財委會連續第二個星期審議關愛基金五十億元撥款，身為關愛基金督導委員會主席的政務司司長唐英年，一次話去四川考察，第二次又話去美國出席兒子畢業禮，連續兩次「龜縮」缺席會議，任由德成局長變成箭靶；五十億撥款在一片爭議和罵聲中得到通過，佢就發個聲明表示「歡迎」，留下一連串議員的質詢叫德成局長承受，這是負責任的做法嗎？這是問責精神嗎？
宋朝大儒朱熹有首《勸學說》，大意是說今天不學還有明天；今年不學還有明年。一天一天一年又一年，人生易老，青春難延，晚年追悔，也是枉然；勸君努力，抓住今天。之不過咁，做學問就要抓緊時間，做夕陽政府高官，就要懂得抓啱良辰，夠唔夠班唔係問題，要言之，夕陽政府最緊要努力抓住今天，笑着Hea住散band，有酒今朝醉。