政情：泛民忽然積極競逐特首
全國人大常委范徐麗泰早前高調表態，話再「玩多兩個月」就會決定係咪參選下屆特首。前港區人大代表吳康民日前更撰文力撐范太參選，並建議另外兩名疑似特首候選人同范太合組「鐵三角」，令原本冇乜動靜嘅特首選舉泛起陣陣漣漪。據聞泛民兩大政黨白鴿黨同公文袋，最近亦一改之前對參選特首持嘅觀望態度，變得相當積極，不過佢哋當然並非真係想做特首，甚至連衝擊小圈子選舉都唔關事，純粹係怕執輸同想搶爆光，為嚟緊嘅區議會同立法會選舉造勢。
上屆特首選舉曾派出現任黨魁梁家傑出戰嘅公文袋，一直無意喺下屆「encore」，認為上次參選已達到衝擊小圈子選舉嘅效果，今屆再選已無新意，有執委甚至強烈反對再參選，認為只會美化咗呢場小圈子，變相幫建制派嘅候選人抬轎。白鴿黨內部亦對參選特首意見分歧，有人就建議最好拉埋公文袋齊齊杯葛，等該黨唔使重蹈上屆為梁家傑抬轎、最後搞到選票一去無回頭嘅覆轍。
馮檢基率先表明參選
不過，即使兩黨唔派人參選，亦唔代表整個泛民會杯葛特首選舉。向來堅決反對小圈子選舉嘅社民連「長毛」梁國雄，早前就講過如果冇泛民中人出戰，佢會考慮參選搞寸個party。知名度偏低嘅民協馮檢基，更率先表明會參選，認為無論最後能否攞到足夠提名，都可以賺取無限嘅曝光宣傳機會，為未來嘅區選立選造勢。
白鴿黨最近開始意識到問題所在，擔心若呢兩位仁兄真係出戰，佢哋定必處於兩難位置，在情就唔想為對方造勢拉票，在理亦冇理由唔撐泛民盟友，不如暫時忘記甚麼「反對小圈子選舉」同「抬轎論」，自己派人參選以免「蝕章」。公文袋則採取「敵不動，我不動」嘅策略，等白鴿黨提議同決定泛民應否參選，如果對方決定出戰，佢哋亦一定唔會執輸。
白鴿黨絕橋 避免抬轎
為免最後又變咗幫公文袋同其他泛民抬轎，白鴿黨仲諗咗一條絕橋，就係搞番個泛民特首初選，仲要係好似美國民主共和兩黨嘅總統候選人初選咁，由泛民嘅成員或支持者一人一票投票篩選。須知論個別候選人嘅民望，白鴿黨極可能會輸畀公文袋，因此若以民調嚟做初選標準，對白鴿黨將極為不利，但如果講到黨員同支持者人數，白鴿黨亦贏足公文袋幾條街，呢個初選制度該黨明顯有利。兩黨最後係咪派人參選，大家等多兩個月就會知架喇！