中央政策組美其名是政府智囊，吸納不同意見，並在問題爆發前預先拆彈，肩負維穩使命。然而，近年中策組已淪為官方民調機構，被多名議員質疑浪費公帑。
中策組的所謂「民調」，一來鬼鬼祟祟，二來「無聊透頂」，據傳問過「李柱銘係唔係漢奸」、「陳方安生係咪忽然民主」、「曾俊華是否需要為預算案引發的爭議辭職」。做埋啲「阿媽係女人」嘅民調，又怎能摸到社會脈搏？難怪被轟公器私用。所謂「心戰室」已淪為「心實塞」，睇怕「通波仔」都冇用，既然質變，即係話換心都殘廢。
政制及內地事務局局長林瑞麟還在立會扮死鴨，一味嘴硬，話「政府一向重視民意」，又廢噏「中策組進行民調是希望透過客觀和科學的方法，了解市民對不同社會事務和政策的看法，作為制訂政策時的參考」云云。林公公除了扮死鴨叻，還擅長扮鸚鵡，官腔套話照本宣科至耍家，難怪被嘲為「人肉錄音機」！之不過你恨唔到咁多，做「錄音機」個個月都攞三十萬人工，吹咩！
政府管治無能，就係衰在不聽民意，一味假諮詢，一味諱疾忌醫，至病情加重先知驚，卻又藥石亂投，甚且頭痛醫腳，腳痛醫頭，本末倒置，醫唔死都一身潺！
醫生有句話：「病人能自知其病之底蘊，則其治療之功已半成。」人貴自知，知道不如人，一時趕不上，但只要努力點，也就不會太落後於形勢。若只懂剛愎自用，穿上皇帝的新衣，吹水天下無敵，社會點會和諧？