有工商界議員就坦言，立法會開會向來唔係鬥講道理，而係純粹鬥人多，無論佢哋點樣冧友，都唔會夠對方多人，加上委員會嘅討論根本全無法律約束力，不如乾脆杯葛好過。如果將來委員會推出一啲不利工商界嘅建議，佢哋更可以大大聲話未徵得佢哋同意，好過明知輸都喺會內拗餐飽，勞氣兼嘥氣。
港府近年推出嘅多項政策，例如競爭法同最低工資等，都畀工商界覺得係衝着佢哋而來，加上又有多場選舉嚟緊，因此近期工商界就一改過往做法，多次就有關問題主動出擊，高調反駁勞工界同民生派政黨嘅論據，有學者更形容工商界正發動緊一場「反左運動」。不過今次立法會嘅小組委員會純齋噏，工商界就認為可以不理。