政情：立會新樓餐廳冇人投標
立法會遷往添馬艦新大樓嘅計劃一波三折，繼工程出現延誤同擺放公共藝術嘅計劃碰壁後，連新大樓內嘅餐廳都冇人肯投標營運，搞到要修改標書再次招標，未交吉入伙就已經咁多事幹，真係大吉利是囉！
立會新大樓地下設有一個千九呎嘅餐廳，專畀班議員、秘書處職員同記者醫肚，上月進行招標，曾經有三間公司向立會申領標書同聽取秘書處簡介，但到月底截止都冇人正式入標。
有份處理招標工作嘅立會行政管理委員會成員李華明估計，承辦商係擔心「冇肉食」而唔肯入標，例如有一間公司就誤以為可以喺餐廳內做喜宴酒席，知道唔得後就放棄，而且標書列明嘅條件多多，好似餐單咁，奶茶就規定要賣八蚊杯，如果要加價又要秘書處批。依家通脹殺到，各類食材不斷加價，加上最低工資條例，市面啲平民餐廳都做唔到一杯奶茶賣八蚊啦，何況係位於中區嘅立會新大樓餐廳？
行管會將於下周二討論有關問題，好可能要放寬標書限制再次招標，否則又再冇人入標，一拖再拖，搞到班議員、職員、記者齊齊冇飯開就大鑊！