政情：孫秉樞開新舖呻租貴
香港舖位租金貴到飛起，搞到生意人冇乜招架之力。近期接連開設專賣店嘅星辰錶（Citizen）代理孫秉樞，都大呻舖租好貴，好似佢日前喺銅鑼灣開設嘅專賣店，千零呎店租每月就高達三十萬元，但為咗推廣品牌形象，幾貴都要咬緊牙關捱過去喎。
早前太子珠寶鐘錶主席鄧鉅明都呻過，銅鑼灣嘅租金升到亂晒龍，某國際名牌鐘錶以三倍搶租，搞到商戶好難做。鐘錶業老行尊孫秉樞就話，咪以為租金上升只係區內問題，其實全香港租金都有升無跌，連紅磡區都貴晒，佢仲話租金成本問題仲嚴重過工資上漲喎。
半年前星辰錶喺旺角開咗第一間專賣店，內地客佔咗一半，生意唔錯，所以佢哋日前喺銅鑼灣開第二間，遲啲打算開第三間添，但都要睇吓新舖成績如何。內地客始終係本港零售業嘅米飯班主，愈係內地客集中嘅遊客區，舖租就愈貴，商戶愈係要搶，唔知有冇智者可以幫手解開呢個循環呢？