政情：中策組無聊民調 嘥公帑
被踢爆為財爺鬍鬚曾應否下台做民調嘅中央政策組，一直對有冇做過民調閃爍其詞。政制及內地事務局局長林瑞麟（林D9）終於打破沉默，尋日以署理政務司司長身份喺立法會默認中策組曾經做過「類似課題」嘅民調。唔認猶自可，一認即被泛民主派議員翻舊帳，話中策組都有做民調問過「李柱銘係咪漢奸？」、「陳方安生係咪忽然民主？」力斥中策組嘥公帑，並淪為煲呔曾嘅政治機器。其實泛民講啱一半，中策組係嘥錢，但最重要係呢啲問題，擺明「亞媽係女人」，仲使問咩。
袋巾傑梁家傑尋日以口頭質詢林D9有關中策組做民調一事，林D9已經表明中策組經常會就唔同嘅政治、經濟及社會議題，或大眾關注嘅事做民調，目的係供制訂政策時參考，但民調結果只供政府內部參考，唔會對外公布。之後袋巾傑無論點樣死捽林D9，林D9都係「人肉錄音機」上身，不斷重複上述答案。
袋巾傑堂堂大狀都逼唔到林D9，涂謹申就立即爆料，話從知情者口中得知，中策組曾經做過有關李柱銘係咪漢奸、「民主阿婆」陳方安生係咪忽然民主嘅民調，究竟呢兩項民調關制訂政策乜嘢事呀？林D9回應時竟然好順攤咁冇否認，只係話唔評論揣測性報道喎。
制訂政策時參考?!
中策組做埋啲咁嘅民調供港府制訂政策時參考，班議員當堂火滾，袋巾傑狠批中策組不務正業，慘變成煲呔曾用嚟犒賞自己友嘅政治酬庸工具，真係非常可惜同遺憾。自由黨主席劉健儀都覺得，中策組角色應該係幫政府施政，做啲咁嘅民調咪嘥晒啲公帑囉。新民黨主席葉劉淑儀更加形容做呢啲民調「非常無聊、無乜意思」。
班議員嘅見解真係精闢獨到，做民調嘅用意就係了解市民諗法，好似阿媽係女人呢啲基本事實，做民調係咪多餘呢？試想吓鬍鬚曾份「史上最廢」財政預算案搞到天怒人怨，早就應該落台啦，仲使問？李柱銘勾結外國勢力，唔係漢奸又係乜呢？況且連佢自己都話要「日日做漢奸」，咁仲要問佢係咪漢奸？民主阿婆年前選入立法會後就成日將民主掛喺口邊，唔係忽然民主又係乜呢？
據林D9所講，中策組係向煲呔曾、唐英年同鬍鬚曾匯報，而中策組有咁多學者，首席顧問仲係劉兆佳教授，如果連呢啲阿媽係女人嘅事實都要嘥公帑做民調，倒不如早啲解散，正確來說係叫呢個廢到無倫嘅特區政府早啲解散呀！