中環出更：棋哥未被維權問題考起
港區全國人大、政協一班大哥大姐，早前應香港友好協進會邀請，齊齊落區做老師，去到唔同中學教學生國情教育，作為協進會主席嘅陳永棋，就去咗蘇浙公學同培正中學，同學生互動討論。雖然棋哥去學校時仲未發生內地維權藝術家艾未未事件，但仍有學生主動問佢有關內地維權人士嘅問題。
棋哥政壇經驗豐富，好淡定回應學生話，祖國十幾億人口，好多都活喺貧窮線之下，所以維穩最重要。其實班人大政協去得上堂都預咗好多學生會問呢條問題，但棋哥話佢哋無夾定答案喎，大家都係憑自己觀點去作答。經此一役，棋哥大讚啲學生哥有獨立思想、有時事性及前衞性，係有前途嘅表現。
楊明標偕友入馬場
棋哥心情咁好，難怪尋晚佢匹愛駒「精密紡」屈居第二，都無損心情啦！講開跑馬，卓妮早前都喺馬場遇到東方錶行主席楊明標，當時佢同一位女士合照，起初卓妮仲誤以為係佢太太，但原來嗰位女士叫衞楊小霞，只係標叔嘅好朋友。
卓妮