中環出更：陳嘉賢鼓勵後生女做廠
今時今日，女士們能頂半邊天，好似○九年奪得「香港青年工業家獎」嘅德國寶（香港）副總裁陳嘉賢（Karen），本身修讀工商管理學，畢業後喺外間打滾咗十年，先至返屋企幫爸爸打理生意，現時主力為旗下品牌做巿場推廣，搞得有聲有色。
好多人都話做廠男多女少，又好污糟，Karen就唔係咁睇，佢話依家嘅廠房既現代化又高科技，仲好乾淨整齊，女仔入去可以發展所長，可考慮從事巿場推廣或管理工作，鼓勵年輕人投身廠房工作。
工總委青年工業家大使
至於去年獲青年工業家獎嘅華明行執行董事高鼎國，三代都做鐘錶業，喺業界做出成績嘅佢，初初做生意都不時碰壁，但每逢遇上有人刁難，佢就會搬爸爸個大名壓場，問題自然迎刃而解。
Karen同高鼎國兩位得獎者，尋日就聯同其餘七位歷屆得獎者一齊被委任做「香港青年工業家獎」大使，宣布今年「香港青年工業家獎」暨「傑出工業家獎」開始接受提名，如果大家見到有合適人選，就快啲提名喇。
講開又講，工總位於長沙灣嘅會址當年以七千幾萬買入，現時已經升值至過億元，但當年拍板買樓嘅工總CEO邱達宏話，現時唔會再打算投資物業，會改為投資股票及債券喎。
卓妮