中環出更：四叔玩低調 封口拒講股
人稱「四叔」嘅恒基地產主席李兆基，尋日以香港培華教育基金會主席身份見傳媒，一向有問必答嘅四叔，講兩句就封晒口，話自己冇牌（香港證券分析牌照），評論股市會好麻煩，又不時以「言多必失」回應提問，唔通有高人指點佢低調行事？
四叔喺長子恒基副主席李家傑（Peter）陪同下，出席喺中華總商會俱樂部舉行嘅聚會。兩父子滿臉笑容，態度友善。
四叔例牌講吓樓市、股市，佢話政府主動推出多幅地皮拍賣，對樓市有利，因為過去太少土地供應，現時逐漸增加供應，可彌補以往供應不足。
對於政府下星期拍賣司徒拔道前嶺南書院、又一村海棠路及元朗牛潭尾地皮，四叔話係咪競投仍要視乎價格而定。
對於樓價，四叔認為豪宅地皮不多，所以仍然看好豪宅市場，佢話有啲豪宅真係好貴都有人買，好似買鑽石、買首飾，再貴都有人買。至於普通住宅市場，四叔就話因為政府推出穩定樓市措施，相信有助樓市平穩發展。
李家傑話三B問題複雜
不過，當四叔被問到股市走勢時，佢就就好鬼馬話自己冇牌（香港證券分析牌照），不便推介股份，又話有朋友提醒佢，「天生兩眼、兩耳、一口子；叫人多見、多聞、宜少言」，言多必失，就係呢個道理。
四叔仲送贈賓客一套自傳，希望將佢八十幾年嘅經歷及事迹，提供畀年輕人立身、立業參考。有人即場索取佢嘅真迹簽名，四叔有求必應，心情靚絕。
難得見到Peter，卓妮梗要追問有冇佢三個BB嘅新相睇吓啦，佢笑住推搪話：「唔好講BB嘢啦！好複雜！」咁買BB奶粉有冇難度？佢笑稱：「梗係冇啦！」見佢一副有子萬事足嘅冧樣，認真幸福。
香港培華教育基金會成立咗廿九年，目的係為國家培訓人才，受益人士已超過一萬七千人次。
尋日現身撐場嘅仲有創會會員方潤華、基金常務委員會主席霍震寰等人。明年基金將步入三十周年，到時會有慶祝活動，大家拭目以待啦！
卓妮