政情：湯彥麟臨別賣膏藥

國泰航空近年不時會遇上員工罷工嘅窘境，不過佢哋近年喺呢類問題上都企得好硬，好多時都唔肯讓步。湯彥麟話，喺香港呢個自由多元嘅社會，無論公司內外都難免會有啲批評話員工工資低，或者工時長，不過佢就希望員工諗一諗，經濟好時，公司係唔係真係冇同員工分享成果、喺困難時期，又係唔係有隨便炒人。

佢仲語重心長咁話，希望員工有意見，可以透過既有渠道反映畀管理層知，千萬唔好做啲傷害公司嘅事，因為咁對公司同二萬幾個依靠公司養家嘅員工都冇好處喎。湯彥麟冇講到乜嘢係損害公司利益嘅事，不過斷估都係講緊罷工啦，唔知佢呢封信感唔感動到班員工呢？