政情：蘇菲梁慢食論爆火
日本爆發核危機，全亞洲處於恐慌之際，經濟動力立法會議員梁劉柔芬（蘇菲梁）尋日就提咗個好有趣嘅動議辯論，就係推動慢食文化。蘇菲梁話，港人對慢食好陌生，以為淨係食得慢，忽略咗背後尊重食物、鼓勵使用本土食材等理念。不過，動議就畀其他黨派修訂到面目全非，包括工聯會葉偉明藉機要求為僱員訂立有薪飯鐘，搞到蘇菲梁發火炮轟，慢食辯論變成口水戰。
蘇菲梁質疑有人騎劫佢嘅動議，將慢食文化「政治化」，希望大家唔識乜嘢叫慢食就睇吓書做吓研究喎！不過，葉偉明就反駁通脹殺到埋身，大把打工仔連食嘅質素都下降，為咗搵多少少錢，求其食幾啖又再開工，甚至唔食飯頂硬上，如果連有薪飯鐘都保障唔到，仲去講慢食？同未學行先學走冇分別。兩個都係功能組別議員，到底邊個真係急市民所急，相信自有公論。