煲呔曾在北大演講時又係廢噏連場，舉頭三尺有神明，佢夠膽死話預算案諮詢期間港人並無強烈要求，但公布後反應完全不同，「我們必須回應要求，改變策略。年輕人、各級基層勞工、中產，各自的要求也不同，我們必須平衡各方面，一定要有務實態度和對人民負責的立場。」喂！你被人撞到個胸啫，乜講啲嘢似撞親個腦多啲喎！
一講到「務實」，睇怕唔單止老朽扯火，根本就係要全城怒吼。煲呔曾上台至今，一味吹水，甚麼六大優勢產業如何如何，結果教育改革一塌糊塗，醫療產業徒留空地養草孳生蚊蟲……總之，高官個個廢噏都以為自己智慧一閃，彷彿鑽石着光；所謂政策，無論醫療融資、擴建堆填區、自願減班、優化交津、速成修訂版預算案等等，高官都自我陶醉，實際是胡混堆砌，蠱惑人心。
煲呔曾，如果你嘅領導班子真係事事務實、虛心聆聽，就唔會搞到成個社會咁動盪不安。以前，我哋雖冇錢但係安分，勇於拚搏，「鬼叫你窮啊！頂硬上啦！」而如今，在你不務實的管治下，啲人窮就變刁民：「我都要生活㗎！我要六千蚊！」一個原本安分寧靜嘅社會，可以搞成示威之都，你也真是個了不起的「政治家」。
早陣子導演馮小剛在微博探討簡體字對文化的影響，他叫領導不准「親愛」簡化成「」，因不見，無心，然後就發生了文化大革命和唐山大地震。曾班子就是個個唯我獨尊，用口親民，施政無心，港遂永無寧日。