政情：立會入不敷支現赤字

立法會現赤字，好大程度同支出大幅增加有關。睇返行管會份財務報告，其中支出增幅最大係職員薪酬，比起○八至○九年度大增一千三百萬，一般開支亦大增六百萬，淨係呢兩項開支已經多咗近一千九百萬，認真唔講得笑。除咗薪酬增幅驚人外，議員酬金同醫療津貼、議員工作開支償還款額等都全面增加，夾埋增加咗一千一百萬，一闊三大之下咪出現赤字囉。

據了解，立法會職員薪酬之所以大幅增加，除咗因為加人工外，更重要係去年開始增聘咗唔少人手，當中尤以保安員嘅增幅最為明顯。大家都知道，立法會嚟緊就會搬入新大樓，到時地方大咗又靚咗，保安人手自然要增加，加上高官辦事無能，激起民怨，惹來示威者包圍立法會，議員又喺議事廳內向官員掟嘢，法寶盡出，招聘保安員條數都幾襟計。

一般開支方面，專業服務開支都有增加，據聞最主要用喺外判法律服務方面，雖然立法會設有法律部，但當立法會遇到一啲極大爭議、或同政府法律意見相悖嘅情況時，立法會好多時都會向外諮詢法律意見，近年行政立法關係咁差，呢方面開支增加亦係意料之內。

現任主席唔識慳錢？

最弊嘅係，立法會嘅投資收入減少，面對開支不斷增加，自然入不敷支。不過，立法會現時累積嘅儲備，大部分都係范徐麗泰擔任立法會主席最後嗰幾年慳落，現任主席同秘書長好應該參考范太嘅慳錢大計。

話時話，班議員經常叫政府放膽使錢，如果真係有需要，即使出現赤字都唔使怕喎，今次立法會罕有出現赤字，唔通同呢個理財哲學有關？