中環出更：查懋聲一支公 吃乳酪夠夠
曾被台灣旺旺集團董事長蔡衍明斥罵「吃人夠夠」嘅亞視股東查懋聲，雖然仲未解決亞視股權爭拗，但此事睇嚟無損佢嘅胃口。
無聊閒逛 邊行邊食
卓妮早前有日下午就喺中環ifc商場見查懋聲一個人無無聊聊閒逛，買完乳酪買麵包，仲要邊行邊吃，一臉陶醉似足小朋友。估唔到查生被人鬧完「吃人夠夠」，仲要一支公吃乳酪夠夠、吃麵包夠夠，莫非佢好肚餓？
卓妮有日傍晚五點幾行經ifc時，竟然遇到查懋聲一支公行街，嗰日天氣涼涼哋，查生着樽領衫外加多件中褸，再搭多條頸巾，全身包到實。不過，唔知佢係貪過癮，仲嫌唔夠凍，居然走去買冰凍嘅乳酪食。見佢走入「yoMAMA」乳酪專門店，喺雪櫃前左望右望，指手劃腳選購相當興奮。查生接過乳酪後仲高興，急不及待拿起匙羹舀番啖。
不過，唔好以為一杯乳酪就滿足到查生，佢心多多再行咗過對面citysuper間麵包舖揀麵包，但佢對住啲麵包並無三心兩意，好快就揀啱叫店員幫佢切好包起，然後拿到收銀處付款。搞掂晒之後，查生即時又低頭密密繼續食乳酪，食得咁專心，都要小心睇路至得喎。
講番間「yoMAMA」乳酪專門店，此店相當受歡迎，卓妮見過唔少名人幫襯，有次就見到城大校長郭位去幫襯，食到舔舔脷，但嗰陣時正係炎炎夏日，食杯冰凍乳酪確係消暑良方。
卓妮