政情：金勞詹提質詢為啖氣？

金勞詹為咗警方喺一條隧道口恢復抄牌，搞到咁勞氣，都幾奇怪。金勞詹家住淺水灣，佢架金色勞斯萊斯同全港獨有喺後座裝設按摩椅嘅金色豐田七人車，可能日日取道香港仔隧道，唔通佢曾經中過超速圈套，所以發炮為自己出番啖氣？

金勞詹矢口否認提質詢係為咗自己，話從未喺香港仔隧道口被抄牌，就算有，亦唔會為嗰一千、幾百蚊動氣，今次純粹路見不平，睇唔過眼警方嘅所作所為。金勞詹投訴，香港仔隧道入面行車最高時速七十公里，但一出隧道就變五十，駕駛者好易誤墮超速陷阱，而有關路段一向唔係交通黑點，警方揀喺嗰度抄牌，動機好值得質疑，一定要警方交代清楚咁話。