政情：大舊入兩粒踢贏領事隊
兔年伊始，立法會足球隊尋日同駐港領事踢咗場賀歲波，雙方傾盡全力，尤其立法會議員大舊陳偉業，上下半場各入一球，加上外援進貢嗰兩球，最後以四比二大勝領事隊，繼續保持不敗紀錄。其實大家都旨在聯誼，好似領事隊就帶備啤酒、小食，踢完波後同議員大擦一餐，過個愉快周末。
尋日嘅領事隊堪稱「八國聯軍」，有來自荷蘭、德國、西班牙、巴林、俄羅斯、柬埔寨、汶萊同歐盟嘅代表。佢哋到場無耐，隨即命人帶來三大碟小食、幾箱汽水、啤酒同果汁，即時緩和咗賽前嘅緊張氣氛。
到正式比賽，退出咗社民連嘅大舊狀態大勇，踢足全場，上半場先一記笠射入網，下半場再一腳熨入，賽後佢話可能自己好耐無踢，恨入波之故，所以表現唔錯。雖然領事隊再度輸畀立法會，不過佢哋都好有風度，邀請立法會隊一齊影相留念兼大飲大食，然後先至盡興而散。