中環出更：瑪利諾籌千萬名人校友齊撐
人才係香港重要資產，所以教育最為重要。向來提供優質教育嘅瑪利諾修院學校，近十幾年來一直透過旗下教育信託基金為學生提供額外教育支援，為配合未來五年發展，該校尋日展開「手牽手行動」，目標籌募一千萬元經費，近百名學生家長與名人校友熱烈響應，首日已籌得二百萬元，其中一百萬元由維多利亞教育機構創辦人丁毓珠慷慨捐出。
今次籌款主要由基金委員會名譽副會長及顧問李麗娟擔大旗，相識滿天下嘅媽打一呼百應，除咗搵到「珠姐」丁毓珠捐錢外，仲有身為校友嘅大新銀行主席王守業夫人及「造紙大王」理文造紙主席李運強大女李文慧幫手，當然唔少得小學部校監余黎青萍及校長羅曾潔貞啦！羅校長仲捐出個人嘅嶺南派手本書畫出來拍賣，六幅書畫共籌得廿五萬九千元。
王守業夫人難忘跑返學校
名人校友飲水思源踴躍捐錢之餘，不忘與卓妮分享昔日校園生活。王守業夫人話，當年由上海來港後居於界限街，屋企好近學校，最難忘係學校嘅上堂鐘聲好響亮，每日聽到鐘聲才匆忙跑返學校，有時帶漏嘢，又跑返屋企攞。
唔講唔知，原來王夫人學有所成後，曾任教中一及中三嘅英文及歷史科，現在又捐錢撐母校，認真有心。
至於出錢又出力撐母校嘅媽打，最難忘係每年五月嘅聖母月，每逢五月一日就會同成班同學到聖母像前唱聖詩。
講番珠姐為何咁闊綽捐出一百萬元，佢話有次聽到媽打提起為母校籌款，心想自己都係辦學，於是本着有教無類精神，希望盡一點綿力幫助一眾莘莘學子。
卓妮