中環出更：陳啟宗着中山裝晒個性
恒隆集團主席陳啟宗（Ronnie）係政商界活躍分子，經常忙於穿梭各種正式場合，所以無論幾時都見佢着住筆挺西裝，包冇失禮人。早前卓妮喺明天更好基金活動上見到佢，佢好罕見咁着件「源」（Blanc de Chine）出品嘅中山裝，着法仲好有主見添！
Ronnie係商界難得一見嘅敢言之人，當日佢親自演繹咩叫做「衣如其人」。佢將件灰色中山裝嘅衣扣全部敞開，同傳統扣到上頸嘅着法好唔同，成個人多咗幾分瀟灑，仲要打番條呔。卓妮忍唔住要讚吓佢，連着衫都有自己嘅主張。
打呔「條條fing」唔方便
Ronnie勁讚中山裝好着又實用，事關衫袋夠大夠多，方便放卡片、電話等隨身物品。不過，出席正式場合始終打番條呔係好啲嘅。難怪佢又套用唐英年嘅經典名句，話打呔「條條fing」好唔方便，唔知係咪想乘機寸吓唐唐。卓妮見佢讚到中山裝一百分，問佢衣櫃入邊係咪有好多件？佢話：「幾件啦！」見佢支持香港品牌「源」嘅出品，不愧係明天更好基金嘅執行委員會主席，幾時都係香港好！