中環出更：肥胡恨食愛心蘿蔔糕

母親秘方 口感十足

識飲識食嘅肥胡年前開始減肥，減少食粥粉麵飯，但賀年美食樣樣正，佢都要宣布破戒。肥胡靜雞雞話畀卓妮知，話晒係「家己冷」，過年唔少得潮式糕點，至愛係媽咪整嘅私房蘿蔔糕。有乜咁正？原來胡老太跟足潮州過年傳統，自製潮式蘿蔔糕，糕身較硬淨，唔似廣東蘿蔔糕咁腍身，蘿蔔絲亦切得較粗，嗒落口感十足，切成薄片煎香，一流！呢款糕坊間已較少見，胡老太有製糕秘方，卓妮都要搵機會向胡老太請教番幾招至得。

轉吓話題，關心已返回澳洲老家嘅前醫管局行政總裁蘇利民。肥胡報喜話，對方近況不知幾好，前排澳洲遭遇世紀水災，肥胡都有致電慰問，好彩蘇利民屋企唔近災區，逃過一劫。