政情：謝凌潔貞繼續做橋樑
早前被捲入審計署「直資風暴」嘅教育局，向來惹火，新任教育局常任秘書長謝凌潔貞（Cherry）可能知道任重道遠，履新未到一個月，尋日請傳媒見面。其實，Cherry出任教育局，算係熟手技工，○一年曾做過當時嘅教育統籌局副常秘，喺時任局長「阿瑟王」李國章同常秘羅范椒芬麾下度過三年零九個月烽火歲月，為連串教改如殺校同基準試撲火，成日幫阿瑟王同羅范做橋樑，喺教育界居中調停。
Cherry尋日講起呢段往事，不無感慨，指當年一上任，就儼如救火隊，要處理嘅棘手課題排住隊嚟，好似新派位制度、母語教學同資歷架構等等，但總算熬過去。今日重返教育局，壓力同樣大，事關教育局用錢多、部門多、政策多，而工作上嘅最大阻力，就係局內政策每次都牽動太多人嘅利益，要擺平各方紛爭，實在唔易。
讚羅范為教界注入動力
Cherry同羅范共事期間，因工作關係形影不離，又同時在職攻讀教育碩士課程，所以Cherry被視為「翻版羅范」。講起呢位前上司，Cherry好有口品，讚羅范語文能力高、記性好，又勤力，自己無得比，又指羅范引進「三三四」高中新學制同直資學校，為教育界注入動力。Cherry咁識做人，唔怪得出任新職前佢做勞工處處長，可以贏得勞工界嘅讚賞喇。
羅范功過如何，各人觀點不同，但當年佢同洋名Arthur、被戲稱「阿瑟王」（Arthur King）嘅李國章，推行政策作風強硬，言論惹火，引致教育界群起反擊，炮火連天，就係不爭事實，亦因為咁，Cherry同呢兩位強人上司，喺局內同僚有截然不同嘅評價，大家用三人嘅英文姓名，即「Arthur King」、「Fanny Law」同「Cherry Ling」，作咗句好啜核嘅順口溜：「Arthur the king, Fanny the law, Cherry the link」。
呢句順口溜頭兩句唔難明，暗諷李國章呢位「教育沙皇」行事作風霸氣，羅范強硬，佢講嘅就係法律，局內無人可以異議。而Cherry the link嘅「link」，即係「連繫」、「橋樑」嘅意思，同Cherry嘅姓「Ling」係諧音，即係指Cherry當時嘅角色，就係理順兩位強人上司同教育界嘅溝通。多年後，Cherry兜兜轉轉又重回教育局，大家又睇吓佢嘅圓滑手腕，同「孫公」孫明揚可以發生乜嘢化學作用。