中環出更：鄧達智20萬手術費冇得賠
醫療保險計劃大行其道，偏偏早十年已為自己購買醫保嘅著名時裝設計師鄧達智，就因為保險經紀幫佢cut咗醫保單冇通知佢，令佢大拿拿廿萬手術費冇得賠。唔少人聽到這樣的消息應該崩潰，但鄧達智就好睇得開，話冇嘢重要得過健康，要自己出錢都在所不惜喎。
早前驗出有頸椎間盤突出症嘅鄧達智，尋日出席香港毛皮業協會舉辦嘅皮草設計比賽時頓成焦點。鄧達智話，條頸係十年前喺新加坡跌倒時扭傷，但自己一直不以為意，即使頸痛都只以為係過勞所致。直至最近發現開始手痹，連笑都笑唔到，先的起心肝去驗身兼做手術。
做完手術個多月嘅鄧達智話，該手術要做成四個鐘，做得唔好仲會有癱瘓嘅危險，笑言自己手術前已向家人交代身後事。佢仲大方向記者show佢頸後嗰條七吋長嘅疤痕，揚言計劃用紋身遮疤，仲話唔排除紋番條蛇喺度，果然係時裝潮人！
卓妮