中環出更：好打得局長打敗仗

尋日晏晝三點幾，戴上口罩嘅林鄭現身中環皇后大道中，佢拎住手袋同文件，腳浮浮咁往政府總部方向行。林鄭雙眼無晒神，黑眼圈盡現，跌晒Watt。

細問之下，原來佢患上感冒，啱啱睇完醫生。病咗都唔抖抖，係咪太多嘢做？林鄭笑而不答，擺出一副硬朗姿態。農曆新年就到，佢話唔會外遊，寧願留港休息，抖足精神喎。

病嘅官員仲有康樂及文化事務署署長馮程淑儀，呢幾日佢幫司徒華治喪委員會張羅場地搞追思會，但因為感冒把聲沙晒，立法會議員張文光介紹佢飲民間古方胖大海，佢飲咗一日，把聲開番七成。

咁啱得咁蹺，行政會議成員劉皇發都病咗，尋日喺立法會會議上，本來有條口頭質詢，關注規管兒童興趣班問題，點知病咗要缺席，最後由黨友梁劉柔芬代佢提問。

卓妮